Loading...

Një javë më parë, gazetarja Mira Kazhani u përfshi në një aksident rrugor në autostradën Tiranë-Durrës, ku një djalë 17-vjeçar këmbësor i preu rrugën automjetit që gazetarja drejtonte, në tentativë për të kaluar në anën tjetër të rrugës, duke pësuar goditje të fortë në trup e kokë, që e ka lënë ende në gjendje kome.

Ky aksident është kthyer në objekt sulmi nga ana e ish-kryeministrit Sali Berisha, i cili duke e quajtur “gazetare të narkoqeverisë”, thotë se pati tentativë për të mos njoftuar prej një jave familjarët për fatin e djalit të tyre. Berisha shkruan në Facebook, duke cituar të dhëna nga një familjar anonim i djalit, se “gazetarja ishte duke drejtuar automjetin në gjendje të dehur dhe se 17-vjeçari është lënë i vetëm në spital”.

9 ditë nga aksidentit, vetë gazetarja Mira Kazhani i është përgjigjur publikisht Sali Berishës duke treguar pse ishte e vështirë që djalit të ri t’i gjendej identiteti dhe prindërit. Ajo shton se gjithë këto ditë, edhe sot ende, janë familjarët e saj, që i kanë qëndruar pranë në spital 17-vjeçarit duke u kujdesur të marrë trajtimin e duhur mjekësor. Ajo thotë se nuk pi alkool, ndërsa i kujton Berishës të vrarët në Gërdec.

Nga Spitali i Traumës, thonë se 17-vjeçari Nertil Pëllumbi është në reanimacion në gjendje traume dhe ende nuk e ka kaluar rrezikun për jetën. Ai mbahet në jetë përmes aparaturave. Ai është identifikuar me vështirësi pasi nëna nuk i jeton më, ndërsa babai i tij punon me periudha të gjata në Korçë në punë të çfarëdoshme për të siguruar jetesën. Të njëjtat burime sqaruan se djali rrinte i vetëm në Tiranë, ndërsa babai e vizitonte shumë rrallë, një herë në 3-4 muaj.

Foto e publikuar nga Berisha e Nertil Pellumbit, djali në reanimacion mbahet në jetë me aparatura

*Shkrim përshkrues nga redaksia e Shqiptarja.com për ngjarjen e ndodhur (Më poshtë, komenti i plotë i gazetares Kazhani)

***

Shkrimi reagues nga Mira Kazhani publikuar në Tiranapost

“Sali Berisha, po të përgjigjem publikisht për aksidentin”

Sali Berisha, unë jam Mira Kazhani. Jam fëmijë i dy prindërve që kanë punuar me nder dhe s’kanë asgjë për të fshehur për fëmijën e tyre, flenë të qetë në darkë për mua.

Para një jave jam përfshirë, edhe pse pa faj, në një ngjarje tronditëse, ku një i ri u hodh me vrap në autostradë, para makinës time, në tentativë për të kapërcyer rrugën.

Nëse nuk u beson policëve, pyet Zenin që ka makinë, dhe do të të thotë se në autostradë përparësi ka makina e jo këmbësori, që rrezikon jetën e tij e të të tjerëve dhe vetëm Zoti mund ta shpëtojë. Ose lexo Kodin Rrugor dhe gjej aktekspertizën time, nëse Zeni është me pushime.

E ke dhe me video nga momenti i aksidentit në komisariat, ku jam ndaluar e kam dhënë dëshminë.

Unë nuk pi alkool. Nuk vë as gjoba me lekë a tekste. Kundër teje kam qenë politikisht që në ’97-ën, kur im vëlla u plagos nga një plumb qorr i bandave në mes të Burrelit.

Nga ato armë që ti i nxore sheshit për të ruajtur veten, pa pyetur se kush po vritej, qoftë edhe aksidentalisht. Këtë javë kam menduar gjatë, por mbi të gjitha jam lutur që ai djalë të bëhet mirë. Aq sa kur më pyesnin nëse isha lënduar vetë, më dukej sikur s’më kuptonin.

Unë jam lënduar, edhe pse pa faj. Nuk ka njeri normal në timon që dëshiron të përfshihet në aksident. Askujt nuk i bëhet qejfi, veç në e paç emrin Sali Berisha, që nuk heq dorë duke nxirë e vrarë edhe të pafajshmit, vetëm për t’i dhënë një orë më shumë jetëgjatësi politikës tënde, që do veç kufoma ndër të shëndoshë e të lënduar.

Unë jam përfshirë pa faj fare, po fare, në një aksident automobilistik, por nuk kam vrarë si ti, 27 vetë në Gërdec, mes tyre fëmijë, dhe ta quaj këtë aksident teknologjik!

Nertili ka pasur çdo ditë në spital shërbimin maksimal të mjekëve. Ka pasur tim atë e familjarët e mi, në mungesë të të tijve, që nuk po gjendeshin.

Dhe sot ka një shpjegim: Policia nuk arrinte dot ta identifikonte, pasi ishte një fëmijë fatkeq, i braktisur, i një familjeje me problemet e saj, të cilët as nuk e kanë regjistruar në gjendje civile. Shenjat e gishtërinjve të tij nuk ekzistonin.

E kuptoj që ty asgje s’të bën përshtypje. Por unë kam veç veten e familjarët e mi për të kaluar këtë shqetësim që s’e shkaktova, por ndodhi.

Ti mos u ndal. Përfshirja jote në sulm publik me gënjeshtra ndaj meje flet më shumë se çdo sulm politik. Mos i përzje gjërat kot. Ti po më sulmon si njeri, jo si gazetare. Unë nuk u bëra gazetare me këtë qeveri. Kam qenë kur ti u ktheve në 2005-ën, edhe kur ike në 2013-ën, jam edhe sot. Unë bëj profesionin tim, pavarësisht se kush është në qeveri. Dhe sipas logjikës tënde, i bie që kam qenë gazetare edhe e oborrit tënd, kur të mbuloja mbledhjet e qeverisë.

E kuptoj që ti gazetarët i ndan në miq dhe armiq. Ata të shërbejnë ty ua mbulon të vërtetat sa herë do ti e siç di ti. Armiqtë i lufton me çdo sajesë!

Gënjeshtra jote nuk është e vërteta e kësaj historie.

Si njeri, të kam lënë Zotin, edhe pse e shoh çdo ditë dorën e tij, teksa ti, lideri i pluralizmit, përfundove në një lolo.

Do jetoj më gjatë se ty dhe do shkruaj gjithmonë sa i mjerë ishe

Loading...
Loading...
loading...